مشروبات شتويه

هوت شوكلت"الشيكولاتة باللبن"

دي أول حاجة هنعملها مع بعض النهارده وعلى فكرة فنجان "الهوت شوكلت" الأطفال بتحبه أوي هما والكبار كمان..

المقادير:-
• 6 ملاعق كبيرة من كاكاو بودرة.
• 4 ملاعق سكر "اختياري"
• 2 كوب ونصف لبن حليب.
• 1/4 ملعقة صغيرة من الفانيليا.
• 1/4 ملعقة شوكولاته بودرة.
• 1/4 ملعقة صغيرة من القرفة "اختياري".

الطريقة:-

اخلطي الكاكاو والسكر مع بعض وضيفيهم إلى اللبن وقلبيهم كويس أوي، وبعد كده حطيهم على النار مع التقليب المستمر لغاية ما اللبن يغلي بعد ما اللبن يغلي صبيه في الفنجان ورشي عليه من على الوش الفانيليا والقرفة وشوية شوكولاته بودرة.

القهوه الفرنسية بالكاكاو

دي حاجة كمان جديدة ممكن تجربيها ...

المقادير:-

• 3ملاعق صغيرة من القهوة.
• كوب لبن حليب.
• ملعقة صغيرة من الكاكاو البودرة.
• 3ملاعق صغيرة من السكر.
• كوب ماء مغلي.
• ملعقة صغيرة فانيليا.
• ملعقة صغيرة قرفة.

الطريقة:
حطي السكر والقهوة والكاكاو والفانيليا والقرفة واللبن مع الماء المغلي مع بعض على النار..مع التقليب المستمر لغاية ما القهوة تغلي وبعد كده صبيها في الفنجان وزينيها برشة من الكاكاو.

سحلب باللبن

من المشروبات الشتوية اللي بتدي طاقة ودفء "السحلب باللبن"

المقادير:-

• كوب لبن حليب.
• 1/2 كوب سمسم محمص.
• كوب سكر بودرة.
• 4 ملاعق كبيرة سحلب
• ملعقة صغيرة قرفة "اختياري"
• 2ملعقة فانيليا.

• 1/4 كوب زبيب.
• 1/2 كوب تشكيلة من المكسرات المحمصة اللي موجودة عندك في البيت "سوداني- عين جمل- جوز-فستق-لوز".
• ملعقة كبيرة قرفة "للتزيين"
• ملعقة كبيرة جوز الهند "للتزيين"
• سكر للتحلية "اختياري"
على فكرة ممكن تشتري مسحوق السحلب جاهز من السوبر ماركت

الطريقة:
تخلطي كل المكونات السابقة ما عدا "اللبن" هتخليطهم كلهم مع بعض وتقلبيهم كويس، وبعد كده تحطي اللبن الحليب وتضيفي له مقدار من السحلب اللي أنت عملتيه أو اللي أنت اشترتيه وتحطيهم مع بعض على النار مع التقليب المستمر من وقت لآخر علشان مفيش حاجة تكلكع منك هتخليه على النار لغاية ما اللبن يغلي وبعد كده تصبيه في الفنجان أو الكوباية وتضيفي إليه السكر اللي أنت محتاجة له... ممكن تزيني الفنجان بشوية قرفة مطحونة أو جوز الهند.

القرفة باللبن

فيه ناس كتير مش بتحب رائحة القرفة بس بالرغم من إن القرفة رائحتها جامدة شوية إلا إن طعمها في غاية الجمال..

المقادير:-

• 1/4 كوب مسحوق القرفة.
• 2كوب لبن حليب.
• ملعقتان صغيرتان فانيليا.
• سكر أو عسل أبيض للتحلية "اختياري".

الطريقة:
هتجيبي القرفة وتذوبيها في الميه وتحطيها على النار لغاية ما تغلي بعد ما تغلي تبدئي تهدي النار شوية وبعد كده تضيفي إليها اللبن وتسيبيهم على النار...بعد ما القرفة باللبن تغلي صبيها في الفنجان وضيفي إلى كل فنجان ملعقة فانيليا وسكر أو عسل نحل أبيض..

وبالف هنا وشفا

مع انك شكلك مبتعرفيش تعملى شاى اساسا
بس بصراحة جربت القهوة الفرنسية
بس بصراحة هايلة جداااااااااااااا
شكلى كنت ظالمك ولا ايه
مشكورة زهرة على المشربات الجميلة دى